نفی احساس تھا اِثبات کہاں تک جاتا

نفی احساس تھا اِثبات کہاں تک جاتا

لے کے تُو لب پہ سوالات کہاں تک جاتا

صبح تک آنکھ میں آیا ہے نکل کر دل سے
جانے یہ خوابِ طلسمات کہاں تک جاتا

دیکھتا ہُوں مَیں اُسے خود سے جُدا ہُوتے ہُوئے
سوچتا ہُوں وہ مرے ساتھ کہاں تک جاتا

مختصر یہ کہ مَیں بوسہ بھی غنیمت سمجھا
یوں ہی دورانِ ملاقات کہاں تک جاتا

یہ ہیولہ جو رُکا ہے تری دُنیا بن کر
یہ پسِ ارض و سماوات کہاں تک جاتا

اولیں دن کا بھی احوال بتایا ہم کو
صاحبِ کشف و کرامات کہاں تک جاتا

اس نے کاندھوں سے شب و روز جھٹک ڈالے ہیں
بوجھ اُٹھائے ہُوئے دن رات کہاں تک جاتا

مل گیا مجھ کو بھی اک آئنہ خانے کا سُراغ
ہُوگئی خود سے ملاقات کہاں تک جاتا

چاند تارے تو مرے بس میں نہیں ہیں آزر
پھول لایا ہُوں مرا ہاتھ کہاں تک جاتا

دلاورعلی آزر