وصل میں ایسی محرومی تھی مل کر تازہ دم نہ ہُوئے

وصل میں ایسی محرومی تھی مل کر تازہ دم نہ ہُوئے

رُوح کی اُلجھن بڑھ جانے سے جسم کے جھگڑے کم نہ ہُوئے

آنکھ میں آ کر ہر چہرے نے ایک نئی صورت پہنی
یوں تو سب ہم شکل تھے لیکن اک دوجے میں ضَم نہ ہُوئے

پیاس کی شدت صحرا کو بھی پیچھے چھوڑنے والی ہے
دریا سُوکھ گیا بل آخر ہونٹ ہمارے نَم نہ ہُوئے

آن کی آن ہے دشت میں روشن ہر ساعت کا عکسِ جمیل
وقت ہی وہ تصویر ہے جس کے نقش کبھی مَدھَم نہ ہُوئے

دونوں اپنی اپنی آگ میں جلتے ہیں اک بستر پر
آنکھ مری اپنی نہ بنی تھی خواب ترے محرم نہ ہُوئے

عُمرگذاری بے خبری سے اپنے آپ میں گُم رہ کر
خواہش کی تو وہ نہ ملا اور وہ جو ملا تو ہَم نہ ہُوئے

کاٹ نہ کر پایا میں آزر اِن ہونٹوں کے سلنے میں
کیسے کیسے اِسم تھے لیکن مُجھ سے پڑھ کر دَم نہ ہُوئے

دلاورعلی آزر