ہَٹ گئے چشمِ تصور سے گُماں کے پردے

ہَٹ گئے چشمِ تصور سے گُماں کے پردے
آکے تصویر میں اب رنگِ تعلق بھر دے

اُس سے ملنا تو اُسے عید مبارک کہنا
یہ بھی کہنا کہ مری عید مبارک کر دے

جانے رعنائی مجھے خواب دکھائے کیسا
جانے بینائی مری آنکھ کو کیا منظر دے

اے محبت میں تری سختی نہیں جَھل سکتا
کچھ رعایت تو مجھے ٹوٹے ہوئے دل پر دے

کب تلک میں تری سوچوں کے تسلسل میں رہوں
اب مجھے چاک پہ رکھ اور کوئی پیکر دے

سب زر و مال کے شیدائی نظر آتے ہیں
کون دُنیا کو رعونت سے بھری ٹھوکر دے

یہ سمندر کا علاقہ ہے سو مرضی اُس کی
جس پہ موتی کی عنایت ہو جسے پتھر دے

مَیں بہت چین سے بیٹھا ہوں سرِ شاخ آزر
جس کو اُڑنے کی تمنا ہے اُسی کو پَر دے
دلاورعلی آزر